退伍軍人病今年已 169 宗：屋企邊度啲水最易生菌？

發生咩事？

衞生防護中心上星期錄得 6 宗社區感染退伍軍人病個案，初步調查顯示屬散發個案。截至 10 月 31 日，香港今年已經錄得 169 宗，比 2025 年全年嘅 167 宗仲多。（港台，11 月 2 日）

退伍軍人菌喺邊度生？

衞生防護中心指，退伍軍人菌喺 20 至 45°C 嘅暖水入面生得好。即係話，屋企啲水如果唔冷唔熱、又成日唔郁，就要留意。

屋企可以點做？

• 熱水爐：儲水式熱水爐唔好長期校到好低溫，溫水最易生菌。如果你部熱水爐有溫度顯示或者調溫掣，睇下設定咗幾多，唔好長期放喺最低嗰格。
• 耐咗冇用嘅水龍頭同花灑：例如去完旅行返嚟，或者少用嘅浴室，用之前先放水最少 1 分鐘（衞生防護中心建議少用嘅出水位每星期或者用之前都咁做）。
• 花灑頭同水龍頭隔濾網：定期拆出嚟檢查、清潔、除水垢同消毒，或者跟生產商建議嘅次數做。

洗衣機都要透吓氣

另外，洗衣機都容易潮濕發霉：洗完打開機門同洗衣粉盒，透吓氣。洗衣機有異味、有黑點，就係時候清洗喇。

想了解洗衣機清洗，可以睇維修兵團嘅 洗衣機專頁。